ఓటమితో కెరీర్‌కు సానియా మీర్జా గుడ్ బై..

భారత టెన్నిస్‌ స్టార్‌ సానియా మీర్జా కెరీర్‌ చివరి మ్యాచ్‌లో పరాజయం
పాలైంది. దుబాయ్‌ ఈవెంట్‌తో కెరీర్‌కు ఫుల్‌స్టాప్‌ పెట్టనున్నట్లు ప్రకటించిన
ఈ హైదరాబాదీ.. మంగళవారం జరిగిన తొలి రౌండ్‌లో ఓడింది. మహిళల డబుల్స్‌ మొదటి
రౌండ్‌లో సానియా మీర్జా-మాడిసన్‌ కీస్‌ (అమెరికా) ద్వయం 4-6, 0-6తో
వెరోనికా-లుడామిలా (రష్యా) జంట చేతిలో ఓటమి పాలైంది. తొలి సెట్‌లో ఒక దశలో
4-4తో చక్కటి ప్రదర్శన కనబర్చిన సానియా జోడీ ఆ తర్వాత అదే జోరు
కొనసాగించలేకపోయింది. 2003లో ప్రొఫెషనల్‌ కెరీర్‌ ప్రారంభించిన సానియా.. 43
డబ్ల్యూటీఏ డబుల్స్‌ టైటిల్స్‌ ఖాతాలో వేసుకుంది. రెండు దశాబ్దాలపాటు కెరీర్‌
కొనసాగించిన సానియా.. 6 గ్రాండ్‌స్లామ్‌ టైటిల్స్‌ చేజిక్కించుకుంది. ఇందులో
మూడు మహిళల డబుల్స్‌ కాగా.. మరో మూడు మిక్స్‌డ్‌ డబుల్స్‌ టైటిల్స్‌ ఉన్నాయి.
గత నెలలోనే ఆటకు వీడ్కోలు పలకనున్నట్లు ప్రకటించిన సానియా.. మంగళవారం
చివరి మ్యాచ్‌ ఆడేసింది. తనకు తొలి గ్రాండ్‌స్లామ్‌ టైటిల్‌ దక్కిన
ఆస్ట్రేలియా ఓపెన్‌లోనే గ్రాండ్‌స్లామ్‌ కెరీర్‌కు ఫుల్‌స్టాప్‌ పెట్టిన
సానియా.. దుబయ్‌ టోర్నీతో ప్రొఫెషనల్‌ కెరీర్‌ కు టాటా చెప్పింది. ఇకపై
వ్యాఖ్యాతగా, కోచ్‌గా, మెంటార్‌గా కొత్త అవతారంలో దర్శనమిస్తానని సానియా
వెల్లడించింది