కపిల్ రికార్డును అధిగమించిన జడేజా..

నాగ్‌పూర్‌లో భారత్-ఆస్ట్రేలియా మధ్య జరుగుతున్న తొలి టెస్టు మ్యాచ్‌లో
రవీంద్ర జడేజా తన అద్భుతమైన ఫామ్‌ను కొనసాగించాడు. ఆల్ రౌండర్ అయిన అతను
శుక్రవారం అద్భుత హాఫ్ సెంచరీతో చెలరేగాడు. బౌలర్లకు అనుకూలమైన పిచ్‌లో
నింపాదిగా బ్యాటింగ్ చేస్తూ.. అర్థశతకం చేశాడు. ఈ నేపథ్యంలోనే జడేజా అరుదైన
ఘనత సాధించాడు. దిగ్గజ ఆటగాడు కపిల్ దేవ్ రికార్డ్‌ను బద్దలు కొట్టాడు.
టీమిండియా తరఫున ఒక టెస్టు మ్యాచ్‌లో ఐదు వికెట్లు తీయడంతో పాటు హాఫ్ సెంచరీ
చేయడం.. జడేజాకు ఇది ఐదోసారి. ఇంతకుముందు కపిల్ దేవ్ నాలుగు సార్లు ఈ ఫీట్
అందుకోగా.. జడేజా ఐదోసారి ఆ ఫీట్ సాధించి, కపిల్ రికార్డ్‌ని చెరిపేసి,
అగ్రస్థానాన్ని కైవసం చేసుకున్నాడు. జడేజా కనబరుస్తున్న ప్రదర్శనతో అభిమానులు
అతనికి ఫిదా అయిపోతున్నారు.
తొలి ఇన్నింగ్స్‌లో భాగంగా తొలుత బ్యాటింగ్ చేసిన ఆస్ట్రేలియా జట్టు, భారత
బౌలర్ల ధాటికి తక్కువ స్కోరుకే చాపచుట్టేసింది. కేవలం 177 పరుగులకే ఆలౌట్
అయ్యింది. భారత బౌలర్లలో జడేజా ఐదు వికెట్లతో చెలరేగిపోగా.. అశ్విన్ మూడు
వికెట్లు, షమీ-సిరాజ్ చెరో వికెట్ తీసుకున్నారు. ఇక ఆ తర్వాత బ్యాటింగ్ కు
దిగిన భారత్.. రెండో రోజు ఆట ముగిసే సమయానికి 7 వికెట్ల నష్టానికి 321 పరుగులు
చేసింది. ప్రస్తుతం తొలి ఇన్నింగ్స్‌లో భారత్ 144 పరుగుల ఆధిక్యంలో ఉంది.
రోహిత్ శర్మ సెంచరీతో ఆకట్టుకోగా.. జడేజా 66, అక్షర్‌ పటేల్‌ 52 పరుగులతో
క్రీజులో ఉన్నారు.
ఇక మ్యాచ్ విషయానికొస్తే.. తొలి టెస్టులో రెండో రోజు ఆట ముగిసే సమయానికి
రోహిత్ శర్మ, రవీంద్ర జడేజా, అక్షర్ పటేల్ అజేయ అర్ధ సెంచరీలతో భారత్ ఏడు
వికెట్ల నష్టానికి 321 పరుగులు చేసింది.