న్యూ ఢిల్లీ : యావత్‌ భారతావనిని గర్వపడేలా చేసిన చంద్రయాన్‌-3 ల్యాండింగ్‌తో
మన శాస్త్రవేత్తలు చరిత్ర సృష్టించారు. అపూర్వమైన విజయాన్ని అందించిన
శాస్త్రవేత్తల కృషిని ప్రముఖులు కొనియాడిన విషయం తెలిసిందే. తాజాగా ఇస్రో
ఛైర్మన్‌ సోమనాథ్‌ కు సంబంధించిన ఓ వీడియో నెట్టింట వైరల్ గా మారింది. 140
కోట్ల మంది ఆకాంక్షలను నెరవేరుస్తూ ఆగస్టు 23న చంద్రయాన్‌-3 జాబిల్లి దక్షిణ
ధ్రువంపై అడుగిడి చరిత్ర సృష్టించింది. శాస్త్రవేత్తల కృషికి ప్రపంచవ్యాప్తంగా
అభినందనలు వెల్లువెత్తాయి. ఇస్రో ఛైర్మన్‌ సోమనాథ్‌ను.. చంద్రుడితో మీ పేరు
కూడా ముడిపడి ఉందంటూ ప్రత్యేకంగా మోడీ పొగిడిన విషయం తెలిసిందే. తాజాగా ఇస్రో
ఛైర్మన్‌ సోమనాథ్‌ ఇండిగో విమానం ఎక్కిన వీడియోను సిబ్బంది పంచుకోగా నెట్టింట
వైరల్ గా మారింది.
ఇస్రో ఛైర్మన్‌ సోమనాథ్‌ గురువారం ఇండిగో విమానంలో ప్రయాణించారు. దీంతో
విమానం టేకాఫ్‌కు ముందు ఆయనను గౌరవిస్తూ సిబ్బంది ప్రత్యేక అనౌన్స్‌మెంట్‌
చేశారు. ‘ఈ రోజు విమానంలో మనతో పాటు ప్రత్యేక వ్యక్తి కూడా ఉన్నారు. మీరు
బోర్టులో ఉన్నందుకు ఎంతో సంతోషంగా ఉంది. మీకు సేవలందించే అవకాశం రావడం
విశేషంగా భావిస్తున్నాం. దేశం గర్వపడేలా చేసినందుకు ధన్యవాదాలు’ అంటూ
ప్రయాణికులంతా చప్పట్లతో ఆయనకు అపూర్వ స్వాగతం పలికారు. అనంతరం ఎయిర్‌
హోస్టెస్‌ ఆయనకు ఫుడ్‌ ట్రేతో పాటు ఒక గ్రీటింగ్‌ కార్డును అందించింది.
ప్రస్తుతం ఈ వీడియో నెటిజన్లను ఆకట్టుకుంటోంది.
తోబుట్టువులకు ఈ రోజు ప్రత్యేకం
ఇండిగో సోదర, సోదరీమణులకు ప్రత్యేకమైన పండగంటే రాఖీనే. కానీ బిజీ ప్రపంచంలో
ఉద్యోగ రీత్యా దూరంగా ఉన్న ఎంతో మంది తోబుట్టువులు రాఖీ పండగను
జరుపుకోలేకపోతున్నారు. కానీ ఇక్కడ ఒక అక్క, తమ్ముడి జంట రాఖీ పండగను విమానంలో
జరుపుకునే అవకాశం లభించింది. ఇందుకు సంబంధించిన వీడియోను ఇండిగో తమ ఎక్స్‌
ఖాతాలో షేర్‌ చేసింది ‘ ఎంత ఎత్తులో ఉన్న తోబుట్టవులకు ఈ రోజు ప్రత్యేకం’ అని
రాసుకొచ్చింది.
వీడియోలో విమానం టేకాఫ్‌ అయ్యేముందు ఇండిగో సిబ్బంది శుభ ప్రయాణీకులకు
ప్రత్యేకమైన అనౌన్స్‌మెంట్‌ చేసింది. ‘ఉద్యోగ్య రీత్యా దూరంగా ఉండటం వల్ల మేము
కొన్ని పండగలు జరుపుకోలేకపోయాం. కానీ ఈ రోజు నాకు మా సోదరుడికి ప్రత్యేకమైన
రోజు. చాలా ఏళ్ల తర్వాత కలిసి రక్షాబంధన్‌ జరుపుకుంటున్నాం’ అంటూ తన సోదరుడు
కెప్టెన్‌ గౌరవ్‌కు రాఖీ కట్టింది. ప్రస్తుతం ఇందుకు సంబంధించిన వీడియో
నెట్టింట వైరల్ గా మారింది.
