తూర్పుగోదావరి జిల్లా : జిల్లాలోని గోకవరం మండలం గుమ్మళ్ళదొడ్డిలో శుక్రవారం ముఖ్యమంత్రి జగన్ మోహన్ రెడ్డి పర్యటించారు. ఈ సందర్భంగా అస్సాగో ఇథనాల్ శుద్ధి కర్మాగారానికి సీఎం శంకుస్థాపన చేశారు. అనంతరం జగన్ మాట్లాడుతూ ప్లాంట్ ఏర్పాటు వల్ల రైతులకు మేలు జరుగుతుందన్నారు. పరిశ్రమల నుంచి పొల్యూషన్ తక్కువ ఉంటుందని తెలిపారు. ఏలూరు కుడి కాలువ నిర్మాణానికి అనుమతి ఇచ్చామన్నారు. ఇథనాల్ పరిశ్రమతో 300 నుంచి 400 మందికి ఉద్యోగాలు వస్తాయన్నారు. స్థానికులకే 75 శాతం ఉద్యోగాలు ఉంటాయని చెప్పారు. రంగుమారిన ధాన్యానికి గిట్టుబాటు ధర లభిస్తుందని సీఎం జగన్ పేర్కొన్నారు. తూర్పుగోదావరి జిల్లా గోకవరం మండలం గుమ్మళ్లదొడ్డిలో అస్సాగో ఇండస్ట్రియల్‌ ప్రైవేట్‌ లిమిటెడ్‌ (ఇథనాల్) పరిశ్రమకు ముఖ్యమంత్రి వైఎస్ జగన్ మోహన్ రెడ్డి శుక్రవారం శంకుస్ధాపన చేశారు. ఈ కార్యక్రమంలో హోంశాఖ మంత్రి తానేటి వనిత, ఐటీ, పరిశ్రమలశాఖ మంత్రి గుడివాడ అమర్నాథ్, రహదారులు, భవనాలశాఖ మంత్రి దాడిశెట్టి రాజా, బీసీ సంక్షేమం, ఐ అండ్‌ పీఆర్‌ మంత్రి చెల్లుబోయిన శ్రీనివాస వేణుగోపాల కృష్ణ, పలువురు ఎంపీలు, ఎమ్మెల్సీలు, ఎమ్మెల్యేలు, ఇతర ప్రజా ప్రతినిధులు, ఉన్నతాధికారులు హాజరయ్యారు.
