ఆస్కార్ బరిలో జూనియర్ ఎన్టీఆర్

యంగ్ టైగర్ ఎన్టీఆర్‌ ఇటీవల రాజమౌళి దర్శకత్వంలో వచ్చిన ఆర్ ఆర్ ఆర్ సినిమాలో
నటించి ప్యాన్ ఇండియా రేంజ్‌లో సూపర్ క్రేజ్ తెచ్చుకున్నారు. ఎన్టీఆర్ ఆర్ ఆర్
ఆర్‌లో కొమరం భీమ్ పాత్రలో ఒదిగిపోయి.. తన నటనతో మైమరిపించారు. ఈ సినిమా
ఇండియాలోనే కాకుండా నెట్‌ఫ్లిక్స్ పుణ్యమా అని.. ప్రపంచవ్యాప్తంగా ఓ రేంజ్‌లో
గుర్తింపును తెచ్చుకుంటోంది. ఈ చిత్రం మార్చి 24 విడుదలై వరల్డ్ వైడ్ గా
బాక్సాఫీస్ వద్ద భారీ వసూళ్లను రాబట్టింది. అంతేకాదు ప్రస్తుతం ఆస్కార్ రేసులో
హాలీవుడ్ సినిమాలతో పోటీ పడుతోంది. అంతేకాదు ఈ సినిమాలో భీమ్ పాత్రలో నటించిన
ఎన్టీఆర్ ఆస్కార్ బరిలో ఉన్నట్లు తెలిపింది ప్రముఖ అమెరికన్ మ్యాగజైన్
వెరైటీ.. ఎన్టీఆర్ ఉత్తమ నటుడుగా, రాజమౌళి ఉత్తమ దర్శకుడు కేటగిరీల్లో
ఆస్కార్‌కు నామినేట్‌ అయ్యే అవకాశం ఉందని పేర్కోంది. ఈ క్రమంలో ఉత్తమ నటుడి
జాబితాలో విల్‌ స్మిత్‌, హ్యూ జాక్‌మన్ వంటి నటులతో పోటీ పడుతూ ఈ టాప్ 10
జాబితాలో ఎన్టీఆర్‌ చోటు దక్కించుకోవడం మామూలు విషయం కాదని అంటున్నారు
విశ్లేషకులు. అంతేకాదు ఓ భారతీయ నటుడు ఇక్కడి దాకా రావడం కూడా ఇదే మొదటిసారని
అంటున్నారు. దీంతో తారక్‌ అభిమానులు సోషల్ మీడియా వేదికగా ఆనందం వ్యక్తం
చేశారు.
టాప్ టెన్ సినిమాల జాబితాలో “బాబిలోన్,” “నోప్,” “గ్లాస్ ఆనియన్: ఎ
నైవ్స్ అవుట్ మిస్టరీ” “బ్లాక్ పాంథర్: వకాండా ఫరెవర్”), విదేశీ భాషా
చలనచిత్రాలు,ఆర్.ఆర్.ఆర్, “ఆల్ క్వైట్ ఆన్ ది వెస్ట్రన్ ఫ్రంట్” తదితర
చిత్రాలు ఉన్నాయి. 2023 ఆస్కార్‌కు ఉత్తమ చిత్రం నామినేషన్‌లను జనవరి 24న
ప్రకటించనున్నారు.