రొమాంటిక్ ప్రేమ కథలో రాశిఖన్నా..?

‘మద్రాస్ కేఫ్’ అనే హిందీ సినిమాతో చిత్రపరిశ్రమకు పరిచయమై, టాలీవుడ్ లో
వచ్చిన ‘ఊహలు గుసగుసలాడే’తో తెలుగు అభిమానులకు దగ్గరైంది యువ కథానాయిక
రాశీఖన్నా. తెలుగులో వరుస సినిమాలలో నటించి మరింత క్రేజ్ ను సొంతం చేసుకున్న ఈ
భామ అటు తమిళ, మలయాళంలోను నటించింది. నటనతోనే కాదు తన పాటలతోనూ అందరిని
మెప్పిస్తుంది. ఇటీవల విడుదలైన ‘సోల్ ఆఫ్ సత్య’ పాటను తెలుగు, తమిళ, హిందీ
భాషల్లో పాడి అందరి మనసులను గెలుచుకున్న ఆమె బాలీవుడ్ యువకథానాయకుడు విక్రాంత్
మాస్సేతో ఓ ప్రేమ కథాచిత్రంలో నటించనున్నట్లు సమాచారం. రోమాంటిక్ కామెడీ
ప్రేమకథగా రానున్న ఆ సినిమాను బోధయాన్ రాయ్ చౌదరి తెరకెక్కించనున్నట్లు
తెలుస్తోంది. ఇంకా పేరు ఖరారు కాని ఆ సినిమా చిత్రీకరణను రెండురోజుల క్రితం
ముంబయిలో ప్రారంభించినట్లు, వచ్చే ఏడాదిలో ఆ సినిమాను విడుదల చేయటానికి చిత్ర
బృందం సన్నాహాలు చేస్తుందని సన్నిహిత వర్గాలు తెలిపాయి. ‘మద్రాస్ కేఫ్’,
విడుదలకు సిద్ధంగా ఉన్న ‘యోదా’ చిత్రాల తర్వాత హిందీలో రాశీ చేసే మూడవ సినిమా
ఇది. ప్రస్తుతం రాశీ తమిళంలో రెండు సినిమాలతో బిజీగా ఉంది.