తమ్ముడి పాట మస్తుంది లే…

మెహర్ రమేష్ దర్శకత్వంలో చిరంజీవి కథానాయకుడిగా తెరకెక్కుతున్న
చిత్రం’భోళాశంకర్’. ఈ సినిమాలో తమ్ముడు పవన్ కల్యాణ్ పాటతో సందడి చేయనున్నట్టు
తెలిపారు అగ్ర కథానాయకుడు చిరంజీవి. చిరు లీక్స్ పేరుతో సామాజిక మాధ్యమాల్లో
అప్పుడప్పుడూ తన సినిమాలకి సంబంధించిన కబుర్లని సరదాగా పంచుకుంటుంటారు
చిరంజీవి. ఆదివారం ఆయన మరోసారి ఆ ప్రయత్నం చేశారు. వచ్చే నెల 11న ప్రేక్షకుల
ముందుకు రానున్న ‘భోళాశంకర్’లోని ఓ సన్నివేశాన్ని పంచుకుంటూ దాని వెనక
సంగతుల్ని వివరించారు. “కల్యాణ్ బాబు తన సినిమాల్లో అప్పుడప్పుడూ నా
ప్రస్తావన తీసుకొస్తూ, నా డ్యాన్సులకి స్టెప్పులేస్తుంటాడు. నా డైలాగులను
అనుకరిస్తూ వినోదం పంచుతుంటాడు. అలా నేను కూడా ‘భోళాశంకర్’లో తన మేనరిజమ్ ని,
తన పాటని అనుకరించి వినోదం పంచుతా అందరూ ఆస్వాదిస్తారని ఆశిస్తున్నా” అంటూ
‘ఖుషి’ సినిమాలోని ‘యే మేరా జహా అంటూ సాగే పాటలో పవన్ మేనరిజమ్ ను అనుకరించిన
ఓ సన్నివేశాన్ని పంచుకున్నారు. ‘తమ్ముడి పాట మస్తుందిలే…’ అంటూ అందులో
చిరంజీవి చేసిన సందడి అభిమానుల్ని అలరిస్తోంది. ఈ సినిమాలోతమన్నా కథానాయికగా
నటిస్తుండగా, కీర్తిసురేశ్ కీలక పాత్ర పోషిస్తున్నారు. ఈ చిత్రంలో సుశాంత్,
రఘుబాబు, వెన్నల కిషోర్ తదితరులు నటిస్తున్నారు.