హెచ్‌సీఏ దిద్దుబాటు చర్యలు.. – జూనియర్‌ ఎన్టీఆర్ కు అవార్డు ఇస్తున్నట్టు ప్రకటన

అంతర్జాతీయ స్థాయిలో హాలీవుడ్ క్రిటిక్స్ అసోసియేషన్(హెచ్ సీఏ)అవార్డులకు
విశేష ప్రాధాన్యత ఉంది. ఇటీవల ఆర్ఆర్ఆర్ సినిమాకు 5 కేటగరీల్లో అవార్డులు
ప్రకటించి..జూనియర్ ఎన్టీఆర్‌ను పట్టించుకోలేదు. ఇది కాస్తా తీవ్ర విమర్శలకు
దారి తీసింది. ఆర్ఆర్ఆర్ మూవీ గోల్డెన్ గ్లోబ్ అవార్డు దక్కించుకోవడం ఆ తరువాత
ఆస్కార్ నామినేషన్‌కు ఎంపిక కావడం తెలిసిందే. ఈ రెండు కీలక పరిణామాల తరువాత
ప్రముఖ అంతర్జాతీయ సంస్థ హాలీవుడ్ క్రిటిక్స్ అసోసియేషన్ ఆర్ఆర్ఆర్ సినిమాకు 5
విభిన్న కేటగరీల్లో అవార్డులు ప్రకటించింది. హాలీవుడ్ బ్లాక్ బస్టర్ సినిమాలైన
బ్లాక్ పాంథర్, బ్యాట్‌మ్యాన్, ది విమెన్ కింగ్, టాప్ గన్ మేవరిక్ సినిమాలను
వెనక్కి నెట్టి మరీ ఆర్ఆర్ఆర్..హెచ్‌సీఏ అవార్డులు దక్కించుకుంది. ఈ అవార్డుల
ప్రదానోత్సం ఇటీవలే జరిగింది. ఈ కార్యక్రమానికి దర్శకుడు రాజమౌళి, హీరో
రామ్‌చరణ్, ఎంఎం కీరవాణి, సెంథిల్ కుమార్ తదితరులు హాజరయ్యారు. అయితే హెచ్‌సీఏ
సంస్ధ రామ్‌చరణ్‌కు అవార్డు ఇచ్చి..జూనియర్ ఎన్టీఆర్‌ను మరచి పోయినట్టుంది.
దాంతో హెచ్‌సీఏ నిర్వాహకులపై భారీగా విమర్శలు వచ్చాయి. ఎన్టీఆర్ ఫ్యాన్స్
పెద్దఎత్తున కామెంట్లు చేశారు. దాంతో హాలీవుడ్ క్రిటిక్స్ అసోసియేషన్
దిద్దుబాటు చర్యలకు దిగింది. జూనియర్ ఎన్టీఆర్‌తో పాటు అలియా భట్‌కు
అవార్డులు పంపిస్తున్నామని ట్విట్టర్ ద్వారా ప్రకటించింది. ఇదిలా ఉండగా ఈ
వేడుకకు రామ్‌చరణ్ తో పాటు దర్శకుడు రాజమౌళి, సంగీత దర్శకుడు ఎం.ఎం. కీరవాణి
సహా ఇతర బృందం హాజరు కాగా, జూనియర్ ఎన్టీఆర్ హైదరాబాద్‌లో ఉన్నారు.