శిశు ఆరోగ్య పరిరక్షణకు బహుముఖ విధానం ఆరోగ్య కుటుంబ సంక్షేమశాఖ కమీషనర్ జె.నివాస్

విజయవాడ : ఒకే అంకె శిశు మరణాల రేటు సాధించడానికి రాష్ట్ర వైద్య ఆరోగ్యశాఖ బహుముఖ విధానాన్ని అమలు చేస్తోందని ఆరోగ్య కుటుంబ సంక్షేమ శాఖ కమీషనర్, జె.నివాస్ అన్నారు. శిశు మరణాలు, వ్యాధిగ్రస్తులను తగ్గించడం లక్ష్యంగా రాష్ట్ర వైద్య ఆరోగ్యశాఖ విజయవాడలో నవజాత శిశువు, బాల్య అనారోగ్యం (ఎఫ్ ఐఎంఎన్సిఐ) వంటి అంశాలతో ఇంటిగ్రేటెడ్ మేనేజ్‌మెంట్‌పై 5-రోజుల శిక్షకులకు శిక్షణా కార్యక్రమాన్ని నిర్వహించింది. రాష్ట్ర వ్యాప్తంగా ఉన్న ఆరోగ్య సంరక్షణ కేంద్రాలలో నవజాత శిశువుల సంరక్షణను మరింత బలోపేతం చేయడం లక్ష్యంగా జరిగిన ఈ సమగ్ర శిక్షణా కార్యక్రమం చివరి రోజైన శుక్రవారం ముగింపు కార్యక్రమానికి ఆయన ముఖ్య అతిధిగా హాజరయ్యారు. ఈ సందర్భంగా ఆయన మాట్లాడుతూ రాష్ట్రంలో ముఖ్యమంత్రి వై.యస్ జగన్మోహన్‌రెడ్డి నాయకత్వం లోని ప్రభుత్వం మాతా శిశు ఆరోగ్య సంరక్షణకు అత్యంత ప్రాధాన్యతనిస్తోందని, ఇందుకు సంబంధించి సమగ్రమైన కార్యక్రమాలను రూపొందించి అమలు చేస్తోందన్నారు. మౌలిక సదుపాయాలు, వనరులను పెంపొందించడానికి, పరికరాలు, మానవ వనరులను ప్రభుత్వం మంజూరు చేసిందన్నారు. అంతేకాక ఒత్తిడి, సేవల భారం ఎక్కువగా వున్న ఆరోగ్య కేంద్రాలలో అదనపు సౌకర్యాలు కల్పించి సేవలను విస్తరించేందుకు అధిక భారం ఉన్న సౌకర్యాలలో మందులు మరియు వినియోగ వస్తువుల కోసం బడ్జెట్‌ కేటాయింపులను పెంచిందన్నారు. ఫ్యామిలీ డాక్టర్ ప్రోగ్రాం ద్వారా, రాష్ట్రం కమ్యూనిటీ స్థాయిలో రక్తహీనత, అధిక ప్రమాదం ఉన్న గర్భిణుల ఆరోగ్య పరిస్థితులను ఎప్పటికప్పుడు గమనిస్తోందన్నారు. తద్వారా సమగ్ర యాంటీనాటల్ కేర్ (ఎఎన్సి), సరైన జనన ప్రణాళికతో ఆరోగ్యకేంద్రాలలో ప్రసవాలను నిర్వహించి , చివరికి ఆరోగ్యకరమైన నవజాత శిశువులను సమాజానికి అందిస్తోందన్నారు.
శిశు మరణాల రేటు (ఐఎంఆర్), నవజాత శిశు మరణాల రేటు (ఎన్ఎంఆర్) తగ్గించడంలో ఎస్ఎన్ సియులు, ఎన్ఐసియులు కీలక పాత్రను పోషిస్తున్నాయన్నారు. వీటిని మరింత బలోపేతం చేయడంపై ప్రభుత్వం ప్రత్యేక శ్రద్ధ చూపుతోందన్నారు. దీనికి అదనంగా అధిక రిస్క్ ఉన్న గర్భిణీలందరికీ వారి ఎఎన్సి చెక్-అప్‌ల సమయంలో ఉచిత రిఫరల్ రవాణా అందిస్తోందన్నారు.
ఈ సమిష్టి ప్రయత్నాలు గణనీయమైన ఫలితాలిచ్చాయని, ఎస్ఎన్సియులలో నియోనాటల్ మరణాలు గణనీయంగా తగ్గాయని వివరించారు.. 2019 నుండి మరణాల రేటు 12 శాతం నుండి 6 శాతానికి పడిపోయిందన్నారు.
శిక్షణా కార్యక్రమం ప్రత్యేకంగా శిశువైద్యులు, ప్రత్యేక నవజాత సంరక్షణ యూనిట్లు (ఎస్ ఎన్సియులు), నియోనాటల్ ఇంటెన్సివ్ కేర్ యూనిట్లలో (ఎన్ ఐసియులు) పనిచేస్తున్న స్టాఫ్ నర్సులకు ప్రత్యేకంగా రూపొందించిన ఈ ఇంటెన్సివ్ ట్రైనింగ్ ప్రోగ్రామ్‌లో క్లాస్‌రూం సెషన్‌లు, మాడ్యూల్ రీడింగ్‌లు, హ్యాండ్-ఆన్ ప్రాక్టికల్ ఎక్సర్‌సైజ్‌లను కలుపుకుని, బ్లెండెడ్ లెర్నింగ్ విధానంలో నిర్వహించారు. శిశు మరణాల స్థాయిని సింగిల్ డిజిట్ స్థాయికి సాధించాలన్న లక్ష్య సాధనకు నిరంతర కృషిఅవసరమని ఆయన అన్నారు. ఎస్ఎన్సియులు, ఎన్ఐసియులలో పని చేస్తున్న ఆరోగ్య సంరక్షణ నిపుణుల నైపుణ్యాన్ని మరింత మెరుగుపరచడంలో ఇటువంటి శిక్షణా కార్యక్రమాలు ఎంతో ప్రాధాన్యత వహిస్తాయన్నారు. ఫ్యామిలీ డాక్టర్ ప్రోగ్రాం ద్వారా గ్రామ స్థాయిలో గర్భిణుల స్క్రీనింగ్ జరుగుతోందన్నారు.
హైరిస్క్ గర్భిణులకు ప్రతినెలా సిహెచ్వోలు కౌన్సెలింగ్ నిర్వహిస్తున్నారన్నారు.
12 ఎస్ ఎన్ సియులు , 5 ఎన్ ఐసియులను ముఖ్యమంత్రి వైఎస్ జగన్మోహన్ రెడ్డి త్వరలో ప్రారంభిస్తారన్నారు.
రాష్ట్రంలో మాతా శిశు మరణాల రేటును తగ్గించేందుకు అవసరమైన అన్ని చర్యల్నీ తీసుకోవాలని ముఖ్యమంత్రి పదేపదే చెప్తున్నారన్నారు.
పుట్టిన ప్రతి బిడ్డనూ కాపాడాలనీ , ఆరోగ్యవంతమైన సమాజాన్ని నెలకొల్పాలన్నదే ప్రభుత్వ లక్ష్యమన్నారు. గర్భిణుల్లో పోషకార లోపం, రక్తహీనత విషయంలో ప్రభుత్వం ప్రత్యేక శ్రద్ధ తీసుకుంటోందన్నారు.
విజయవాడలో స్టేట్ రిసోర్స్ సెంటర్ ను త్వరలో అందుబాటులోకి తీసుకొస్తామన్నారు. హైరిస్క్ గర్భిణులకు రానూపోనూ ఉచిత ప్రయాణ సౌకర్యాన్ని ప్రభుత్వం కల్పిస్తోందన్నారు.
శిక్షణ పొందిన మాస్టర్ ట్రయినర్లు వారివారి రీజియన్ లలో తిరిగి సమర్ధవంతంగా శిక్షణివ్వాలన్నారు. టీఓటీ ప్రధాన ఉద్దేశం నెరవేర్చే దిశగా పిడియాట్రీషియన్లు, స్టాఫ్ నర్సులు కృషి చేయాలని నివాస్ అన్నారు. కేంద్ర ప్రభుత్వ ఆరోగ్య కుటుంబ సంక్షేమశాఖ పరిశీలకులుగా ఢిల్లీ నుండి డాక్టర్ వీరేంద్ర కుమార్, మధ్యప్రదేశ్ నుండి డాక్టర్ అమిత్ ద్వివేది, డాక్టర్ అర్జునరావు (జెడి, చైల్డ్ హెల్త్ & ఇమ్యునైజేషన్), డాక్టర్ విక్రమ్ రెడ్డి(యునిసెఫ్ చైల్డ్ హెల్త్ స్టేట్ కన్సల్టెంట్, డాక్టర్ విజయ్‌ కుమార్ (చైల్డ్ హెల్త్ స్టేట్ కన్సల్టెంట్), చిలకా పాములు (చైల్డ్ హెల్త్ స్టేట్ డేటా మేనేజర్), విజయవాడ పాత ప్రభుత్వాస్పత్రి పెడియాట్రిక్స్ విభాగాధిపతి డాక్టర్ ఇందిర తదితరులు పాల్గొన్నారు.