ఘనంగా ఏపీడబ్ల్యూజేఎఫ్ ఆవిర్భావ దినోత్సవ వేడుకలు

విశాఖపట్నం : ఆంధ్రప్రదేశ్ వర్కింగ్ జర్నలిస్టుల ఫెడరేషన్ 16వ ఆవిర్భావ దినోత్సవ వేడుకలు ఆదివారం వన్ టౌన్ లోని శ్రీ వివేకానంద అనాధాశ్రమంలో ఘనంగా జరిగాయి. ఈ వేడుకలను ఉద్దేశించి జాతీయ జర్నలిస్టుల సంఘం కార్యదర్శి, ఏపీడబ్ల్యూజేఎఫ్ రాష్ట్ర కార్యదర్శి గంట్ల శ్రీనుబాబు మాట్లాడుతూ గత 16 ఏళ్లగా జర్నలిస్టుల సంక్షేమానికి ఫెడరేషన్ అహర్నిశలు శ్రమిస్తూ వచ్చిందని చెప్పారు. అన్ని ప్రాంతాల్లోనూ జర్నలిస్టులకు ఇల్లు, ఇళ్ల స్థలాలు, భీమా, వైద్య ఆరోగ్యం ఇతర సంక్షేమ పథకాల అమలుకు పెద్ద ఎత్తున కృషి చేసిందని చెప్పారు. మున్ముందు ఏపీడబ్ల్యూజేఎఫ్, ఏపీ బ్రాడ్ కాస్ట్ జర్నలిస్టుల అసోసియేషన్ ప్రతి జర్నలిస్టుకు చేయూతనిస్తూ వారి కష్టకాలంలో భాగస్వామ్యం కానుందని తెలియజేశారు.

ఫెడరేషన్ నిరంతరం పడ్డ శ్రమ ఫలితంగా రాష్ట్ర వ్యాప్తంగా జర్నలిస్టులకు ముఖ్యమంత్రి జగన్మోహన్ రెడ్డి ప్రభుత్వం మూడు సెంట్ల ఇళ్ల స్థలాలను కేటాయిస్తూ క్యాబినెట్లో తీర్మానం చేసిందని చెప్పారు. ఏపీడబ్ల్యూజేఎఫ్ విశాఖపట్నం జిల్లా అధ్యక్షులు పోతుమహంతి నారాయణ్ మాట్లాడుతూ జర్నలిస్టుల సమస్యల పరిష్కారానికి ఫెడరేషన్ అత్యధిక ప్రాధాన్యత ఇచ్చిందని తెలియజేశారు ఫెడరేషన్ ఆవిర్భావం నుండి సంస్థ బలోపేతానికి చేయూతనిచ్చిన ప్రతి ఒక్కరికి ధన్యవాదాలు తెలిపారు. ఈ సందర్భంగా వృద్ధులకు వస్త్రాలు స్కూల్ పిల్లలకు నోట్ పుస్తకాలను పంపిణీ చేశారు అనంతరం అనాధలకు అన్నదాన కార్యక్రమం ఏర్పాటు చేశారు. రెండు రోజుల క్రితం రాష్ట్ర క్యాబినెట్ జర్నలిస్టులకు ఇళ్ల స్థలాలు కేటాయిస్తూ తీసుకొన్న నిర్ణయం మేరకు ముఖ్యమంత్రి వైఎస్ జగన్మోహన్ రెడ్డి చిత్రపటానికి పాలాభిషేకం చేశారు. జగన్ కు జై జై అంటూ నినాదాలు చేశారు. ఈ కార్యక్రమంలో ఏపీ బ్రాడ్ కాస్ట్ జర్నలిస్టుల అసోసియేషన్ విశాఖపట్నం జిల్లా అధ్యక్షులు ఇరోతి ఈశ్వరరావు, ఇతర నేతలు కృష్ణవేణి, భగవాన్, రవిశంకర్, నగేష్ ఆశ్రమ వ్యవస్థాపకులు సూరాడ అప్పారావు తదితరులు పాల్గొన్నారు.