తిరుపతి : తిరుపతి మహతి కళాక్షేత్రంలో గురుపూజోత్సవ వేడుకల్లో ఆంధ్ర ప్రదేశ్
పర్యాటక శాఖ మంత్రి రోజా పాల్గొన్నారు. ఈ సందర్భంగా మంత్రి మాట్లాడుతూ
విద్యారంగంలో అనేక మార్పులను సీఎం జగన్మోహన్ రెడ్డి తీసుకొచ్చారన్నారు.
ప్రభుత్వ పాఠశాలల వైపు విద్యార్థులు ఎక్కువగా మొగ్గు చూపేలా ప్రభుత్వం చర్యలు
తీసుకుందన్నారు. మాజీ మంత్రి నారాయణ రాష్ట్రాన్ని దోచుకున్నారని ఆరోపించారు.
గురువుల్లోనే కళంకితుడు నారాయణ అని, కలెక్షన్ కింగ్ చంద్రబాబు అంటూ వ్యాఖ్యలు
చేశారు. పవన్ కళ్యాణ్‌కు చంద్రబాబు రాజకీయ గురువన్నారు. రాష్ట్రాన్ని ఏ విధంగా
దోచుకోవాలో పవన్ కళ్యాణ్‌కు నేర్పుతున్న గురువు చంద్రబాబు అంటూ విమర్శించారు.
చంద్రబాబుకు బినామీ రాజధాని అమరావతి అని మంత్రి దుయ్యబట్టారు. వేల కోట్ల
రూపాయల అక్రమార్చన చంద్రబాబు ఇంట్లో ఉందన్నారు. రెండు ఎకరాల చంద్రబాబు 2 వేల
కోట్ల రూపాయలను ఎలా సంపాదించారని ప్రశ్నించారు. రాష్ట్ర ప్రజలు కళ్ళు
తెరిచారని, చంద్రబాబు అబద్ధపు మాటలను నమ్మడం లేదన్నారు. త్వరలో కేసీఆర్ కూడా
చంద్రబాబును తరిమికొట్టబోతున్నారన్నారు. ఈడీ, సీబీఐలు విచారణ జరిపి చంద్రబాబు,
లోకేశ్‌లను అరెస్టు చేయాలని మంత్రి రోజా వ్యాఖ్యలు చేశారు.
