నూతన జాతీయ విద్యావిధానం వల్ల అనేక ప్రయోజనాలు
ఎస్కేయూ స్నాతకోత్సవంలో పాల్గొన్న ఆంధ్రప్రదేశ్ గవర్నర్‌ నజీర్‌
అనంతపురం : నేటి యువతరానికి ఎన్నో సవాళ్లతో పాటు అవకాశాలు ఉన్నాయని ఏపీ
గవర్నర్‌ అబ్దుల్‌ నజీర్‌ అన్నారు. సోమవారం అనంతపురం ఎస్కే యూనివర్సిటీ 21వ
స్నాతకోత్సవంలో గవర్నర్‌ నజీర్‌ పాల్గొన్నారు. ఈ సందర్భంగా ఎస్కే
యూనివర్సిటీలో శ్రీ కృష్ణదేవరాయ విగ్రహానికి గవర్నర్‌ నజీర్‌ నివాళులు
అర్పించారు. ఈ క్రమంలోనే నూతన అకాడమీ, హాస్టల్‌ భవనాలను గవర్నర్‌
ప్రారంభించారు. ఈ సందర్భంగా గవర్నర్‌ నజీర్‌ మాట్లాడుతూ ప్రపంచంలో ఎన్ని
సవాళ్లు ఉన్నాయో, అన్ని అవకాశాలు ఉన్నాయి. విద్య శక్తివంతమైన ఆయుధం అన్న విషయం
మరిచిపోవద్దు. కృషి, పట్టుదల, సృజనాత్మకత ఉంటే ఏదైనా సాధించవచ్చు.
విద్యార్థులు ఎప్పుడూ సానుకూల దృక్పథంతో ఉండాలి. కేంద్రం తీసుకువచ్చిన నూతన
జాతీయ విద్యావిధానం వల్ల అనేక ప్రయోజనాలు ఉన్నాయన్నారు.
