సీఎం జగన్‌ సమక్షంలో వైఎస్సార్‌సీపీలోకి భారీగా చేరికలు

అమరావతి, ప్రధాన ప్రతినిధి : ఆంధ్రప్రదేశ్‌లో వైఎస్సార్‌ కాంగ్రెస్‌ పార్టీ హవా కొనసాగు​తోంది. ఇతర పార్టీల నుంచి రోజురోజుకు వైఎస్సార్‌సీపీ లోకి వలసలు పెరుగుతున్నాయి. తాజాగా ముఖ్యమంత్రి వైఎస్‌ జగన్‌మోహన్‌రెడ్డి సమక్షంలో మంగళవారం తాడేపల్లి లోని సీఎం క్యాంపు కార్యాలయంలో వివిధ జిల్లాలకు చెందిన నేతలు వైఎస్సార్‌సీపీలో చేరారు. రాజంపేట టీడీపీ ఇంచార్జి గంటా నరహరి సీఎం జగన్‌ సమక్షంలో వైఎస్సార్‌సీపీలో చేరారు. గంటాకు వైఎస్‌​ జగన్‌ మోహన్ రెడ్డి పార్టీ కండువా కప్పి సాదరంగా ఆహ్వానించారు. ఈ కార్యక్రమంలో వైఎస్‌ఆర్‌సీపీ రీజనల్‌ కోఆర్డినేటర్‌ పి.వి.మిథున్‌రెడ్డి, ఒంగోలు పార్లమెంట్‌ వైఎస్‌ఆర్‌సీపీ ఎంపీ అభ్యర్ధి చెవిరెడ్డి భాస్కర్‌ రెడ్డి పాల్గొన్నారు. అలాగే నూజివీడు మాజీ ఎమ్మెల్యే చిన్నం రామకోటయ్యకు కూడా పార్టీ కండువా కప్పి వైఎస్సార్‌సీపీలోకి సీఎం జగన్‌ ఆహ్వానించారు. విజయవాడకు చెందిన పలువురు టీడీపీ మాజీ కార్పొరేటర్లు, జనసేన నాయకులు సైతం వైఎస్సార్‌సీపీలో చేరారు. సీఎం జగన్‌ సమక్షంలో గండూరి మహేష్, నందెపు జగదీష్‌ (మాజీ కార్పొరేటర్లు), కొక్కిలిగడ్డ దేవమణి (మాజీ కోఆప్షన్‌ మెంబర్‌), కోసూరు సుబ్రహ్మణ్యం (మణి) టీడీపీ రాష్ట్ర బీసీ సెల్‌ సెక్రటరీ, గోరంట్ల శ్రీనివాసరావు, మాజీ డివిజన్‌ అధ్యక్షులు, బత్తిన రాము (జనసేన విజయవాడ తూర్పు నియోజకవర్గం ఇంఛార్జి) వైఎస్సార్‌సీపీలో కండువా కప్పుకున్నారు. ఈ కార్యక్రమంలో వైఎస్‌ఆర్‌సీపీ ఎంపీ కేశినేని నాని, ఎమ్మెల్యే వెలంపల్లి శ్రీనివాసరావు, ఎమ్మెల్సీ రుహుల్లా, విజయవాడ ఈస్ట్‌ వైఎస్‌ఆర్‌సీపీ ఎమ్మెల్యే అభ్యర్ధి దేవినేని అవినాష్‌, పార్టీ నేతలు పాల్గొన్నారు. విశాఖపట్నంకు చెందిన పలువురు సీనియర్‌ నాయకులు సీఎం వైఎస్‌ జగన్‌ సమక్షంలో వైఎస్‌ఆర్‌ కాంగ్రెస్‌ పార్టీలో చేరారు. జి.వి.రవిరాజు (సీనియర్‌ నాయకులు), బొగ్గు శ్రీనివాస్, బొడ్డేటి అనురాధలకు (జనసేన నాయకులు) పార్టీ కండువా కప్పి ఆహ్వానించారు సీఎం వైఎస్ జగన్. ఈ కార్యక్రమంలో వైఎస్‌ఆర్‌సీపీ రీజనల్‌ కోఆర్డినేటర్‌ వైవీ. సుబ్బారెడ్డి, గాజువాక వైఎస్‌ఆర్‌సీపీ ఎమ్మెల్యే అభ్యర్ధి గుడివాడ అమర్‌నాథ్, విశాఖ నార్త్‌ వైఎస్‌ఆర్‌సీపీ ఎమ్మెల్యే అభ్యర్ధి కే.కే. రాజు పాల్గొన్నారు. సీఎం వైఎస్ జగన్ సమక్షంలో సూళ్లూరుపేట, వెంకటగిరి నియోజకవర్గాలకు చెందిన పలువురు నేతలు వైఎస్సార్‌సీపీలో చేరారు. పార్టీలో చేరిన వారిలో‌ వేనాటి రామచంద్రారెడ్డి- సూళ్ళూరుపేట, మస్తాన్ యాదవ్ -వెంకటగిరి, మాజీ ఎమ్మెల్సీ అంగూరి లక్ష్మీశివకుమారి, గొరకపూడి చిన్నయ్యదొర తదితరులు వున్నారు. సీఎం వైఎస్ జగన్ మోహన్ రెడ్డి వారికి పార్టీ కండువాలు కప్పి ఆహ్వానించారు. ఈ కార్యక్రమంలో వైఎస్‌ఆర్‌సీపీ రీజనల్‌ కోఆర్డినేటర్‌ పి.వి.మిథున్‌రెడ్డి, సూళ్ళూరుపేట ఎమ్మెల్యే కిలివేటి సంజీవయ్య, వెంకటగిరి వైఎస్‌ఆర్‌సీపీ ఎమ్మెల్యే అభ్యర్ధి నేదురుమల్లి రామ్‌కుమార్‌ రెడ్డి, నెల్లూరు డీసీసీబీ ఛైర్మన్‌ కామిరెడ్డి సత్యనారాయణ రెడ్డి పాల్గొన్నారు.