స్టార్ క్రికెటర్ బయోపిక్ లో రామ్ చరణ్..?

‘ఆర్ఆర్ఆర్’ సినిమాతో గ్లోబల్ స్టార్ గా మారిన రామ్ చరణ్, తన ఫ్యూచర్
ప్రాజెక్ట్ ఎంచుకునే విషయంలో చాలా జాగ్రత్తగా అడుగులు వేస్తున్నారు. ‘ఉప్పెన’
ఫేం బుచ్చిబాబు దర్శకత్వంలో ఆయన ఓ చిత్రంలో నటించబోతున్న విషయం తెలిసిందే.
లోకేష్ కనకరాజ్, ప్రశాంత్ నీల్, సుకుమార్ లు కూడా చరణ్ దర్శకుల వరుసలో
వున్నారు. వీరి సినిమాలు ప్రస్తుతం చర్చల దశలో ఉన్నాయి. ఇదిలావుంటే.. రామ్
చరణ్ ప్రాజెక్టుల విషయంలో ఓ ఆసక్తికరమైన వార్త ఫిలింనగర్ వర్గాల్లో బలంగా
వినిపిస్తుంది. రామ్ చరణ్ త్వరలో స్టార్ క్రికెటర్ విరాట్ కోహ్లి బయోపిక్ లో
నటించనున్నట్లు విశ్వసనీయ సమాచారం. ఈ సినిమాను ఓ ప్రముఖ బాలీవుడ్ సంస్థ
నిర్మించనున్నట్లు తెలిసింది. విరాట్ కోహ్లి బయోపిక్ గురించి గతంలో చాలాసార్లు
వార్తలొచ్చాయి. చాలా మంది హీరోలు కూడా ఈ విషయంపై తెరపైకొచ్చారు. చివరకు విరాట్
కోహ్లీ గా రామ్ చరణ్ కనిపించనున్నారన్న వార్త ఇప్పుడు బాలీవుడ్ లో కూడా
సంచలనంగా మారింది. విరాట్ కోహ్లి పుట్టినరోజైన నవంబర్ 5న ఈ సినిమాకు
సంబంధించిన అధికార ప్రకటన విడుదల కానుందని సమాచారం. దర్శకుడితోపాటు ఇతర
వివరాలు కూడా అప్పుడే తెలుపనున్నారట.