టీ-20లో సూర్యకుమార్ అద్బుత ప్రదర్శన

అంతర్జాతీయ టి20ల్లో సూర్యకుమార్ యాదవ్ సూపర్ ఫామ్ లో ఉన్నాడు. టి20 ప్రపంచకప్ 2022లో భాగంగా పాకిస్తాన్ తో జరిగిన మ్యాచ్‌లో తక్కువ స్కోరుకే అవుటైన సూర్యకుమార్.. నెదర్లాండ్స్ తో జరిగిన పోరులో రెచ్చిపోయాడు. నెదర్లాండ్స్ తో జరిగిన పోరులో 25 బంతుల్లోనే 51 పరుగులు చేసి అజేయంగా నిలిచాడు. ఇందులో 7 ఫోర్లు, 1 సిక్స్ ఉన్నాయి. 204 స్ట్రయిక్ రేట్ తో భారత్ కు భారీ స్కోరును అందించడంలో సాయపడ్డాడు. ఇక ఈ ఏడాది అంతర్జాతీయ టి20ల్లో అత్యధిక పరుగులు చేసిన ప్లేయర్ గా నిలిచేందుకు పాకిస్తాన్ ఓపెనర్ మొహ్మద్ రిజ్వాన్ తో సూర్యకుమార్ యాదవ్ పోటీ పడుతున్నాడు. ఈ రికార్డు ఇద్దరి మధ్య దాగుడుమూతలు ఆడుతోంది. ఈ మ్యాచ్ ముందు వరకు ఈ జాబితాలో రిజ్వాన్ ముందున్నాడు. అయితే నెదర్లాండ్స్ తో జరిగిన మ్యాచ్ లో అర్ధ సెంచరీ చేసిన సూర్యకుమార్ రిజ్వాన్ ను వెనక్కి నెట్టేశాడు. సూర్యకుమార్ యాదవ్ ఈ ఏడాది అంతర్జాతీయ టి20ల్లో ఇప్పటి వరకు 867 పరుగులతో అగ్రస్థానంలో ఉన్నాడు. ఇక జింబాబ్వేతో జరిగిన మ్యాచ్ లో రిజ్వాన్ (14) మరోసారి విఫలం అయ్యాడు. ప్రస్తుతం రిజ్వాన్ ఈ ఏడాది టి20ల్లో 839 పరుగులు చేశాడు. వీరి మధ్య ప్రస్తుతం ఉన్న అంతరం 28 పరుగులు మాత్రమే. దాంతో ఎవరు అత్యధిక పరుగులతో ఈ ఏడాదిని ముగిస్తారో చూడాలంటే టి20 ప్రపంచకప్ ముగిసేదాకా వేచి ఉండాల్సిందే.