సైనా ఓట‌మి – టోర్నీ నుంచి నిష్క్ర‌మ‌ణ‌

భార‌తీయ స్టార్‌ షట్లర్‌ సైనా నెహ్వాల్‌ డెన్మార్క్‌ ఓపెన్‌లో అనూహ్యంగా ఓట‌మిపాలైంది. ఆరంభ రౌండ్‌లోనే ఆమె ఓట‌మిపాలై సిరీస్ నుంచి వెనుదిరిగింది. మరోవైపు పురుషుల సింగిల్స్‌లో యువ కెరటం లక్ష్యసేన్‌, సీనియర్‌ షట్లర్‌ హెచ్‌ఎస్‌ ప్రణయ్‌ ప్రీక్వార్టర్స్‌కు దూసుకెళ్లారు. సైనా 17-21, 21-19, 11-21తో చైనాకు చెందిన జాంగ్‌ యి మన్‌ చేతిలో ఓటమిపాలైంది. జాంగ్‌ చేతిలో ఓడడం సైనాకు ఈ ఏడాదిలో రెండోసారి. అన్‌సీడెడ్‌గా బరిలోకి దిగిన లక్ష్యసేన్‌ 21-16, 21-12తో ఆరోసీడ్‌ ఆంథోనీ సినిసుక (ఇండోనేసియా)ను చిత్తుచేశాడు. మరో మ్యాచ్‌లో ప్రణయ్‌ 21-13, 22-20తో పెంగ్‌ (చైనా)ను ఓడించి సహచరుడు లక్ష్యసేన్‌తో ప్రీక్వార్టర్స్‌ పోరుకు సిద్ధమయ్యాడు. పురుషుల డబుల్స్‌ తొలిరౌండ్లో ఏడోసీడ్‌ సాత్విక్‌/చిరాగ్‌ శెట్టి జోడీ 21-15, 21-19తో కొరియా జంట కాంగ్‌ మిన్‌/సియో సెంగ్‌పై గెలిచింది.