టాలీవుడ్‌లో రీరిలీజ్‌ల సందడి

ప్రస్తుతం టాలీవుడ్‌లో రెగ్యులర్‌ రిలీజులతో పాటు రీరిలీజ్‌ల సందడి బాగా
పెరిగిపోయింది. గతంలో విడుదలైన స్టార్ హీరోల సినిమాలు మళ్లీ థియేటర్లలోకి
అడుగుపెడుతున్నాయి. మహేశ్‌ పోకిరీతో స్టార్ట్అయిన ఈ ట్రెండ్‌ తాజాగా
రామ్‌చరణ్‌ పుట్టిన రోజు సందర్భంగా రిలీజైన ఆరెంజ్‌ వరకు వచ్చింది. మధ్యలో
ఒక్కడు, జల్సా, వర్షం తదితర సినిమాలు రీ రిలీజయ్యాయి. తాజాగా ఆ
జాబితాలోకి అల్లు అర్జున్‌ బ్లాక్ బస్టర్‌ మూవీ దేశ ముదురు కూడా చేరునుంది.
బన్నీ పుట్టిన రోజు సందర్భంగా ఏప్రిల్‌ 6న దేశముదురు సినిమాను రీ-రిలీజ్‌
చేస్తున్నట్లు ప్రకటించారు మేకర్స్‌. ‘మరోసారి థియేటర్‌లలో బాలగోవింద్‌ (అల్లు
అర్జున్‌) స్టైలిష్‌, మాస్‌ స్వాగ్‌నిచూడటానికి సిద్ధంగా ఉండండి! ఏప్రిల్‌ 6న
కుమ్మేస్కుందాం’ అని డీవివి దానయ్య ఎంటర్‌టైనమెంట్స్‌ సోషల్ మీడియాలో ఈ
విషయాన్ని అధికారికంగా ప్రకటించింది. దీంతో అల్లు అర్జున్ అభిమానులు ఫుల్‌
ఖుషీ అవుతున్నారు. ఈసారి రచ్చ మాములుగా ఉండదంటూ కామెంట్ల వర్షం
కురిపిస్తున్నారు.

సెన్సేషనల్‌ డైరెక్టర్ పూరీ జగన్నాధ్ తెరకెక్కించిన ఈ యూత్‌ఫుల్ యాక్షన్‌
ఎంటర్‌టైనర్‌లో బన్నీ తొలిసారి సిక్స్ ప్యాక్‌తో కనిపించడం విశేషం. ఈ
సినిమాతోనే హన్సికా మెత్వానీ హీరోయిన్‌గా సినిమా ఇండస్ట్రీలోకి
అడుగుపెట్టింది. దివంగత సంగీత దర్శకుడు చక్రి అందించిన స్వరాలు సూపర్‌హిట్‌గా
నిలిచాయి. మరి దేశముదురు రీ-రిలీజ్‌తో ఈ సినిమాకు ప్రేక్షకులు ఎలాంటి
రెస్పాన్స్ అందిస్తారో చూడాలి.