అఫ్రిది కుమార్తెతో షాహిన్ అఫ్రిది వివాహం..

పాకిస్తాన్‌ యంగ్‌ పేసర్‌ షాహీన్‌ షా అఫ్రిదీ ఓ ఇంటివాడయ్యాడు. మాజీ
క్రికెటర్‌, ఆల్‌రౌండర్‌ షాహిద్‌ అఫ్రిది కుమార్తె అన్షాతో కలిసి నిఖా
చేసుకున్నాడు. కరాచీ నగరంలో జరిగిన వీరి వివాహ వేడుకకు ఇరు కుటుంబ సభ్యులు,
బంధువులు, సన్నిహితులతో పాటు పలువురు పాక్‌ క్రికెటర్లు హాజరయ్యారు. నూతన
దంపతులకు శుభాకాంక్షలు, అభినందనలు తెలిపారు.
వివాహం తర్వాత గ్రాండ్‌గా రిసెప్షన్ కూడా ఏర్పాటుచేశారు. పాక్ క్రికెట్‌
జట్టు కెప్టెన్ బాబర్ ఆజం, సర్ఫరాజ్ అహ్మద్, షాదాబ్ ఖాన్, మహ్మద్ హఫీజ్, మాజీ
కోచ్ సక్లైన్ ముస్తాక్ తదితరులు ఈ వేడుకకు హాజరయ్యారు. అలాగే షాహీన్‌ కు
పీఎస్‌ఎల్‌ (పాకిస్తాన్‌ సూపర్‌ లీగ్‌) జట్టు, లాహోర్‌ ఖలందర్స్‌ జట్టు
సభ్యులు శుభాకాంక్షలు తెలిపారు. కాగా, షాహీన్‌-అన్షాల ఎంగేజ్‌మెంట్‌ రెండేళ్ల
క్రితమే జరిగింది. అయితే అన్షా చదువులకు తోడు షాహీన్‌ క్రికెట్‌ షెడ్యూల్‌లో
బిజీగా ఉండడంతో పెళ్లి పీటలెక్కేందుకు ఇంత సమయం పట్టింది. ప్రస్తుతం పాక్‌కు
ఎలాంటి ఇంటర్నేషనల్‌ మ్యాచ్‌లు లేకపోవడంతో ఆ దేశ క్రికెటర్లంతా విదేశీ
క్రికెట్‌ లీగ్‌ల్లో బిజీగా ఉన్నారు. మొన్నటివరకు షాహీన్‌ అఫ్రిది కూడా
బంగ్లాదేశ్‌ ప్రీమియర్‌ లీగ్‌లో ఆడాడు. అయితే వివాహం కోసం స్వదేశానికి తిరిగి
వచ్చాడు. ప్రస్తుతం షాహీన్‌-అన్షాల పెళ్లి ఫొటోలు సోషల్‌ మీడియాలో వైరల్‌గా
మారాయి. సహచర క్రికెటర్లతో పాటు పలువురు నెటిజన్లు కొత్త దంపతులకు
విషెస్‌ చెబుతున్నారు.