ఆంక్షల పేరుతో అంధురాలి పెన్షన్ తొలగింపు కర్కశత్వం : చంద్రబాబు

అమరావతి : ప్రభుత్వం పెన్షన్ నిలిపివేయడంతో అనంతపురం జిల్లాలో గిరిజన మహిళ ఆత్మహత్యకు పాల్పడిన ఘటన రాష్ట్రవ్యాప్తంగా చర్చనీయాంశంగా మారింది. ఈ విచారకర ఘటనపై మాజీ సీఎం, టీడీపీ అధినేత నారా చంద్రబాబు నాయుడు స్పందించారు. ‘‘ కొంచెం మానవత్వం చూపండి జగన్ గారూ! మాటల్లో కాదు చేతల్లో..ఆంక్షల పేరుతో అంధురాలి పెన్షన్ తొలగింపు కర్కశత్వం. ఆమె ఆత్మహత్య అత్యంత హృదయవిదారకం’’ అంటూ ‘ఎక్స్’ వేదికగా చంద్రబాబు తీవ్రంగా విమర్శించారు. ఏపీ హేట్స్ జగన్ అనే హ్యాష్‌ట్యాగ్‌ను తన ట్వీట్‌కు జోడించారు.

ఇంకెంత మంది దివ్యాంగులను బలి తీసుకుంటావు జగన్ : నారా లోకేశ్

అనంతపురం జిల్లా గుంతకల్ మండలం నక్కనదొడ్డికి చెందిన దివ్యాంగురాలు సరోజ ఆత్మహత్య ఘటనపై టీడీపీ జాతీయ ప్రధాన కార్యదర్శి నారా లోకేశ్ స్పందించారు. సరోజ కళ్లు కనిపించవని, కళ్లుండీ ఆమె ప్రాణాలు రక్షించలేకపోయాని వైఎస్సార్‌సీపీ సర్కారుపై మండిపడ్డారు. ఆమె తమ్ముడికి ఉద్యోగం వచ్చిందనే కారణం చూపి ఏడాదిగా పెన్షన్ నిలిపేశారని, తనకున్న ఏకైక ఆసరా కోల్పోయాననే బెంగతో సరోజ ఆత్మహత్యకు పాల్పడిందని పేర్కొన్నారు. ఇంకెంత మంది దివ్యాంగులు, వృద్ధులను బలి తీసుకుంటావు సైకో జగన్ అంటూ ముఖ్యమంత్రిపై ధ్వజమెత్తారు. కాగా ఫించను తొలగించారనే ఆందోళనలతో అనంతపురం జిల్లా గుంతకల్లు మండలంలోని నక్కనదొడ్డి తండాకు చెందిన సరోజ అనే 40 ఏళ్ల అంధురాలు ఆత్మహత్యకు పాల్పడిన విషయం తెలిసిందే. పుట్టుకతో అంధురాలైన ఆమెకు చిన్నప్పటి నుంచి ఫించను వచ్చేది. అయితే ఆమె తమ్ముడికి రైల్వేలో ఉద్యోగం రావడం, అతడి పేరు కూడా రేషన్ కార్డులో ఉన్న కారణంగా ప్రభుత్వం ఫించను ఆపేసింది.
[https://bloomtimes.org/images/srilekha_/CBN.jpg]